BESH YOSHIDA CHEMPION BO‘LGAN BOLA

 

Bo‘lajak grossmeyster Nodirbek Abdusattorov 2004-yil 18-sentyabr kuni Toshkent shahrida tug‘ilgan. 5 yoshidan musobaqalarda ishtirok etib keladi. 2021-yilda shaxmatning rapid yo‘nalishi bo‘yicha chempion bo‘lib, ushbu natijani qayd etgan eng yosh shaxmatchiga aylandi. 2022-yilda o‘tkazilgan 44-shaxmat olimpiadasida O‘zbekiston sharafini himoya qilib, jamoasi bilan birgalikda mamlakatimizga dastlabki Olimpiada chempionligini olib keldi. Nodirbek besh yoshida O‘zbekiston chempioni bo‘ldi. Osiyo, jahon chempionatlarida ham ishtirok etgan champion ayni kunlarda Niderlandiyada bo‘lib o‘tayotgan «Tata Steel Chess – 2023» musobaqasida Magnus Karlsen ustidan sensatsion g‘alabaga erishgani barchamizni quvontirdi.

– Oilaviy muhit tufayli shu sport turini tanlaganman. Otam shaxmatni juda yaxshi o‘ynaydi. O‘zlari ham o‘quvchilik davrida musobaqalarda qatnashgan. Keyinchalik
bizga ham o‘rgatdi. Oilaviy, uyda oyim­dadam, akam­opam o‘rtalarida
o‘ziga xos kichik musobaqalar bo‘lib turardi. Boshida akam Humoyun va opam Bahora shaxmat o‘ynay boshladi. Men esa ularni kuzatib, juda qiziqib qoldim. Ularning harakati, dona surishlarini kuzatib, taqlid qila boshladim. Aytishlaricha, o‘sha paytda menga hech kim shaxmat donalarini ko‘rsatib, qanday yurish kerakligini o‘rgatmagan. Keyinchalik shaxmatga bo‘lgan qiziqishimni sezgan ota­onam meni ham
to‘garakka olib bordi. Kuniga ikki mahaldan mashg‘ulotlarga borardim. Tushlikdan keyingi mashg‘ulotdan juda kech qaytardik. Charchaganimdan avtobusda uxlab qolardim. Birinchi murabbiyim Ravshan aka Shukurov shaxmatga bo‘lgan qiziqishimni ko‘rib, men bilan jiddiy ishladi.

Besh yoshimda esa 8 yoshgacha bo‘lgan bolalar o‘rtasida o‘tkazilgan turnir chempioni bo‘ldim. Nodirbek ayni paytda Niderlandiyada bo‘lgani bois suhbatimiz qisqa bo‘ldi. Qolgan savollarga uning otasi Fazliddin Ochilovdan javob oldik.

– Bolaligimda stolga qora qalamda shaxmat taxtasi rasmini chizib, qog‘ozdan figuralar yasab, aka­ukalar shaxmat o‘ynardik. Shu orqali o‘yinda yutqazgan o‘yinchi uy ishlarini qilardi. Dastlab, o‘g‘lim Humoyunga o‘rgatdim. Nodirbekning shaxmatga
nisbatan qiziqishini sezgan murabbiylari ham bir ko‘rishda undan jahon chempioni chiqishini sezishgan. Chunki bolaligida ham xotirasi kuchli, qiziquvchan
edi. Onasi to‘garakka olib borardi. Ba’zida Nodirbekni bekatdan uygacha ko‘tarib
kelardi... Bejizga mehnatning tagi rohat, deb aytilmagan. O‘g‘lim shaxmatdan tashqari, rus va ingliz tilini yaxshi o‘zlashtirgan. Hozir arab tilini o‘rganyapti. Sportning boks turi bilan shug‘ullanadi. Chempionning otasi musobaqalarda yo‘l qo‘yilgan xatolarni tahlil qilish muhimligi, murabbiy bilan kechgan mashg‘ulot –
sportchining o‘sishida eng muhim jarayon ekanligini ta’kidlaydi.

Nodirbekning muvaffaqiyati, shubhasiz, xalqimizning muvaffaqiyatidir.

 

Aziz ABDUMALIK
suhbatlashdi